chennaiidhal
Last Updated:
இருசக்கர வாகனத்தில் தேநீர் விற்கும் தந்தை, குடும்பத்தை கவனிக்கும் தாய் என குடும்ப வறுமையும் தாண்டி, வாழ்க்கையில் சாதிப்பதற்கு எதும் தடையில்லை என்பதை நிரூபித்துள்ளார் மாணவி சிந்து.
‘சாதிப்பதற்கு எதுவும் தடையில்லை’ என்பதை நிரூபிக்கும் விதமாக மூன்றாவது மாடியில் இருந்து தவறி விழுந்து இடுப்புக்கு கீழ் செயல் இழந்து முடங்கிய நிலையிலும் 12ம் வகுப்பு மாணவி பொதுத் தேர்வை உதவியாளர் துணை கொண்டு எழுதுகிறார்.
சென்னை கோடம்பாக்கத்தை சேர்ந்த சிந்து, தனது வீட்டின் அருகே உள்ள கட்டடத்தின் மூன்றாவது மாடியில் இருந்து தவறி விழுந்து, தற்போது நடமாட முடியாத நிலையில் உள்ளார். தியாகராய நகரில் உளள வித்யோதயா மேல்நிலைப் பள்ளியில் 10-ம் வகுப்பு பயின்று வந்த இவரின் வாழ்வில், 2020-ம் ஆண்டு சோகமான ஆண்டாக மாறியது. தோழிகளுடன் விளையாடிய போது, தனது வீட்டின் அருகில் உள்ள கட்டடத்தில் இருந்து தவறி விழுந்ததில், இடுப்புக்கு கீழ் செயல் இழந்து முடங்கினார்.
இதையடுத்து, ராஜீவ் காந்தி அரசு மருத்துவமனையில் 6 மாதத்திற்கு மேல் தொடர்ந்து சிகிச்சை அளிக்கப்பட்டது. மீண்டும் இயல்பு நிலைக்கு திரும்ப முடியாத போதும், ஆசிரியர்கள், பெற்றோர் கொடுத்த நம்பிக்கையால் வீட்டில் இருந்தே படித்து வந்தார். தற்போது, 12-ம் வகுப்பு பொதுத் தேர்வை உதவியாளர் துணை கொண்டு எழுதுகிறார்.
இருசக்கர வாகனத்தில் தேநீர் விற்கும் தந்தை, குடும்பத்தை கவனிக்கும் தாய் என குடும்ப வறுமையும் தாண்டி, வாழ்க்கையில் சாதிப்பதற்கு எதும் தடையில்லை என்பதை நிரூபித்துள்ளார் மாணவி சிந்து. இதற்கு, அவரின் தலைமையாசிரியர் ஊக்கமாக இருந்ததுடன், 12-ம் வகுப்புக்கான கட்டணத்தையும் பள்ளி நிர்வாகமே ஏற்றுக்கொண்டதாக மாணவியின் தந்தை கூறுகிறார்.
கைப்பந்துப் போட்டியில் மாவட்ட அளவிலான போட்டிகளில் விளையாடிய சிந்து, இன்று வீட்டிற்குள் முடங்கியுள்ளார். இருந்த போதும், கல்வியே வாழ்வில் ஒளியேற்றும் என்ற நம்பிக்கையில் 12-ம் வகுப்பு பொதுத் தேர்வை எழுதுகிறார்.
May 05, 2022 11:04 AM IST
